ଦେଶର ଦୁଇ ବଡ ସେଠ୍‌ ଙ୍କ ମଧ୍ୟରେ ମହାଭରତ୍ତ! ମୁକେଶ ଅମ୍ବାନୀ ଓ ଜି ଟିଭି, ଜି ନ୍ୟୁଜ୍‌ର ମାଲିକ ସୁଭାଷ ଚନ୍ଦ୍ରାଙ୍କ ମଧ୍ୟରେ ଲଢ଼େଇ। ଆଉ ଏହି ଲଢ଼େଇ କୌଣସି ବନ୍ଦ କୋଠରୀରେ ହୋଇନାହିଁ, ବରଂ କ୍ୟାମେରା ସାମ୍ନାରେ ହୋଇଛି। ସୁଭାଷ ଚନ୍ଦ୍ରାଙ୍କୁ ଆପଣ ଛୋଟ ଲୋକ ଭାବିବେ ନାହିଁ। କାରଣ ଆଜି ଆପଣ ଯେଉଁ ଆଇପିଏଲ୍‌ ଦେଖୁଛନ୍ତି, ତାହାର ପଛରେ ସୁଭାଷ ଚନ୍ଦ୍ରାଙ୍କର ମଧ୍ୟ ବଡ଼ ଅବଦାନ ରହିଛି। ସେ ଇଣ୍ଡିଆନ୍ କ୍ରିକେଟ୍ ଲିଗ୍‌ (ଆଇସିଏଲ୍‌) ଆରମ୍ଭ କରିଥିଲେ। ପରେ ଲଲିତ ମୋଦୀ ଏହି ଧାରଣାକୁ ନେଇ ଆଇପିଏଲ୍‌ ଆରମ୍ଭ କରିଥିବା କୁହାଯାଏ। ଏହି ସୁଭାଷ ଚନ୍ଦ୍ରା ହେଉଛନ୍ତି ସେହି ବ୍ୟକ୍ତି, ଯାହାଙ୍କ ଜି ନ୍ୟୁଜ୍‌ ଭାରତର ପ୍ରଥମ ଘରୋଇ ଟେଲିଭିଜନ୍‌ ନ୍ୟୁଜ୍‌ ଚ୍ୟାନେଲ୍‌ଗୁଡ଼ିକ ମଧ୍ୟରୁ ଅନ୍ୟତମ ଥିଲା। ଜି ନ୍ୟୁଜ୍‌ରେ ପ୍ରଥମ ଥର ପାଇଁ ଭାରତରେ କୌଣସି ଚଳଚ୍ଚିତ୍ରର ଟେଲିଭିଜନ୍‌ ପ୍ରିମିୟର୍‌ କରାଯାଇଥିଲା। ଡିସ୍‌ ଟିଭି ମଧ୍ୟ ତାଙ୍କ ବ୍ୟବସାୟିକ ସାମ୍ରାଜ୍ୟର ଏକ ଅଂଶ ଥିଲା। ତେଣୁ ସୁଭାଷ ଚନ୍ଦ୍ରା ନିଜେ ଜଣେ ବଡ଼ ଶିଳ୍ପପତି। ଭାରତର ମିଡିଆ ଓ ମନୋରଞ୍ଜନ ଶିଳ୍ପରେ ତାଙ୍କର ଏକ ବଡ଼ ଇତିହାସ ରହିଛି।କିନ୍ତୁ ଜି ଗ୍ରୁପ୍‌ର ପ୍ରତିଷ୍ଠାତା ସୁଭାଷ ଚନ୍ଦ୍ରା ନିଜ ଚ୍ୟାନେଲ୍‌ରେ ଆସି ଯେତେବେଳେ ମୁକେଶ ଅମ୍ବାନୀଙ୍କୁ ନେଇ ଗୁରୁତର ଅଭିଯୋଗ କଲେ, ସେତେବେଳେ ଅନେକ ଲୋକ ଆଶ୍ଚର୍ଯ୍ୟ ହୋଇଗଲେ।ସୁଭାଷ ଚନ୍ଦ୍ରା ଅଭିଯୋଗ କରି କହିଥିଲେ ଯେ, ମୁକେଶ ଅମ୍ବାନୀ ଜି ନ୍ୟୁଜ୍‌ ଓ ଜି ଟିଭିକୁ ନିଜ ନିୟନ୍ତ୍ରଣକୁ ନେବାକୁ ଚେଷ୍ଟା କରିଥିଲେ। ତାଙ୍କ ବିରୋଧରେ ଅମ୍ବାନୀଙ୍କ ସହ ଜଡ଼ିତ ଚ୍ୟାନେଲ୍‌ଗୁଡ଼ିକ ମିଥ୍ୟା ଖବର ପ୍ରସାରଣ କରୁଥିବା ମଧ୍ୟ ସେ ଅଭିଯୋଗ କରିଥିଲେ। ସେ ଆହୁରି କହିଥିଲେ ଯେ, ସେ ଏଭଳି ଜଣେ ବ୍ୟକ୍ତି, ଯାହାଙ୍କ ପାଖରେ ଏବେ ହରାଇବା ପାଇଁ ବହୁତ କିଛି ବାକି ନାହିଁ। କିନ୍ତୁ ମୁକେଶ ଅମ୍ବାନୀଙ୍କ ପାଖରେ ହରାଇବାକୁ ବହୁତ କିଛି ରହିଛି। ଏପରିକି ତାଙ୍କ ଆଲମାରିରେ ମଧ୍ୟ ଅନେକ ‘କଙ୍କାଳ’ ବନ୍ଦ ଥିବା ଭଳି ଏକ ଟିପ୍ପଣୀ ସେ କରିଥିଲେ। ଅନ୍ୟପକ୍ଷରେ, ମୁକେଶ ଅମ୍ବାନୀ ସାଧାରଣତଃ କୌଣସି ଖବର ଉପରେ ସିଧାସଳଖ ପ୍ରତିକ୍ରିୟା ଦିଅନ୍ତି ନାହିଁ। ଏଥର ମଧ୍ୟ ସେ ନିରବ ରହିଛନ୍ତି। କିନ୍ତୁ ରିଲାଏନ୍ସ ପକ୍ଷରୁ ଏହାର ଜବାବ ଦିଆଯାଇଛି।ରିଲାଏନ୍ସ ପକ୍ଷରୁ କୁହାଯାଇଛି ଯେ, ସେମାନଙ୍କ ଚ୍ୟାନେଲ୍‌ ପକ୍ଷରୁ କାହାକୁ ଉଦ୍ଦେଶ୍ୟମୂଳକ ଭାବେ ଆକ୍ରମଣ କରାଯାଇନାହିଁ। ଏଥିସହ ସୁଭାଷ ଚନ୍ଦ୍ରାଙ୍କୁ ଭବିଷ୍ୟତ ପାଇଁ ଶୁଭକାମନା ମଧ୍ୟ ଜଣାଯାଇଛି।ଅମ୍ବାନୀଙ୍କ ଏହି ‘ଶୁଭକାମନା’କୁ ନେଇ ମଧ୍ୟ ଅନେକ ଲୋକ ବିଭିନ୍ନ ଆଲୋଚନା କରିଥିଲେ। କିଛି ଲୋକଙ୍କ ମତରେ, ସୁଭାଷ ଚନ୍ଦ୍ରାଙ୍କ ପାଇଁ ଆଗାମୀ ଦିନ କଠିନ ହୋଇପାରେ। କିନ୍ତୁ ଦୁଇ ବଡ଼ ଶିଳ୍ପପତିଙ୍କ ମଧ୍ୟରେ ଏହି ବିବାଦ ଅପେକ୍ଷା ପ୍ରଶ୍ନଟି ଆହୁରି ବଡ଼। କାରଣ ସୁଭାଷ ଚନ୍ଦ୍ରାଙ୍କୁ ନେଇ ଏଭଳି ଖବର ମଧ୍ୟ ସାମ୍ନାକୁ ଆସିଛି ଯେ, ବ୍ୟାଙ୍କଗୁଡ଼ିକ ତାଙ୍କଠାରୁ ହଜାର ହଜାର କୋଟି ଟଙ୍କାର ଦାବି କରିଥିଲେ। ପରେ ଏହି ଦାବିର ଏକ ଛୋଟ ଅଂଶରେ ସମାଧାନ ହୋଇଥିବା ଖବର ପ୍ରକାଶ ପାଇଥିଲା। ଏହାପରେ ଅନେକ ଇନ୍‌ଫ୍ଲୁଏନ୍ସର୍‌ ଏହି ଘଟଣାକୁ ନେଇ ଖବର ଓ ଭିଡିଓ ପ୍ରସ୍ତୁତ କରିଥିଲେ। ନ୍ୟୁଜ୍‌୧୮ ମଧ୍ୟ ସୁଭାଷ ଚନ୍ଦ୍ରାଙ୍କ ସମ୍ପର୍କିତ ଏହି ଖବରକୁ ଗୁରୁତ୍ୱ ଦେଇ ପ୍ରସାରଣ କରିଥିଲା। ଏବେ ମୁକେଶ ଅମ୍ବାନୀ ଓ ସୁଭାଷ ଚନ୍ଦ୍ରାଙ୍କ ମଧ୍ୟରେ ଏହି ବିବାଦକୁ ଦେଖି ସାଧାରଣ ଲୋକଙ୍କ ମନରେ ଏକ ବଡ଼ ପ୍ରଶ୍ନ ଉଠିଛି। ଭାରତରେ ଋଣ ମାମଲାରେ ଧନୀ ଓ ଗରିବଙ୍କ ପାଇଁ କ’ଣ ଅଲଗା ନିୟମ ରହିଛି? ଦ୍ୱିତୀୟ ପ୍ରଶ୍ନ ହେଉଛି, ସୁଭାଷ ଚନ୍ଦ୍ରାଙ୍କ ଭଳି ଜଣେ ବଡ଼ ଶିଳ୍ପପତିଙ୍କୁ କାହିଁକି ଏଭଳି କହିବାକୁ ପଡ଼ୁଛି ଯେ ତାଙ୍କ ପାଖରେ ମାତ୍ର ୬ କୋଟି ଟଙ୍କା ବାକି ଅଛି ଏବଂ ସେହି ଟଙ୍କା ମଧ୍ୟ ସରକାର ନେଇଯିବ? ସେ ନିଜ ଘରକୁ ଭଡ଼ାରେ ଦେଇଛନ୍ତି ଏବଂ ସେଥିରୁ ମିଳୁଥିବା ଟଙ୍କାରେ ନିଜ ଖର୍ଚ୍ଚ ଚଳାଉଛନ୍ତି ବୋଲି ମଧ୍ୟ କହିଥିବା ଖବର ଆସିଛି। ଏହି ଘଟଣା ସାଧାରଣ ଲୋକଙ୍କ ପାଇଁ କାହିଁକି ଗୁରୁତ୍ୱପୂର୍ଣ୍ଣ? କାରଣ ଜଣେ ସାଧାରଣ ଲୋକଙ୍କ ଗୋଟିଏ ଋଣ କିସ୍ତି ବାକି ପଡ଼ିଲେ ବ୍ୟାଙ୍କ ପକ୍ଷରୁ ତାଙ୍କ ଘର ପର୍ଯ୍ୟନ୍ତ ନୋଟିସ୍‌ ଓ ଅନ୍ୟାନ୍ୟ ପଦକ୍ଷେପ ଆରମ୍ଭ ହୋଇଯାଏ। କିନ୍ତୁ ବଡ଼ ଶିଳ୍ପପତିଙ୍କ ଋଣ ମାମଲାରେ ବ୍ୟାଙ୍କର ଆଭିମୁଖ୍ୟ କ’ଣ ଅଲଗା ହୋଇଯାଏ? ଆଉ ଏକ ବଡ ପ୍ରଶ୍ନ ହେଉଛି—ସୁଭାଷ ଚନ୍ଦ୍ରା ଯେତେବେଳେ ନିଜ ଚ୍ୟାନେଲ୍‌ରେ ଆସି ଅନ୍ୟ ଏକ ଚ୍ୟାନେଲ୍‌ ଓ ମୁକେଶ ଅମ୍ବାନୀଙ୍କ ବିରୋଧରେ ଏଭଳି ଅଭିଯୋଗ କରୁଛନ୍ତି, ତେବେ କ’ଣ ସତରେ ଅମ୍ବାନୀ ତାଙ୍କୁ ବରବାଦ କରିବାକୁ ଚେଷ୍ଟା କରିଥିଲେ?ଯଦି ଏଭଳି କୌଣସି ଚେଷ୍ଟା ହୋଇନଥିଲା, ତେବେ ସୁଭାଷ ଚନ୍ଦ୍ରା କାହିଁକି ମୁକେଶ ଅମ୍ବାନୀଙ୍କ ଉପରେ ଏଭଳି ଅଭିଯୋଗ ଆଣୁଛନ୍ତି? ପ୍ରଶ୍ନ ଆମର ବିଚାର ଆପଣଙ୍କର…