ବ୍ରହ୍ମପୁର ଟାଉନ୍ ଥାନା ପୋଲିସ ଏକ କଥିତ ପୋଞ୍ଜି ସ୍କିମ୍ ମାମଲାରେ ଜଣେ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ହେଲେ ରାଜସ୍ଥାନର ଜୟପୁର ଜିଲ୍ଲାର ଶରିଫ ମହମ୍ମଦ। ତାଙ୍କ ବୟସ ପ୍ରାୟ ୪୫ ବର୍ଷ।
ପୋଲିସ ସୂଚନା ଅନୁସାରେ, ଅଗଷ୍ଟ ୧୭ ତାରିଖ ସନ୍ଧ୍ୟାରେ ବ୍ରହ୍ମପୁର ଟାଉନ୍ ଥାନାକୁ ଖବର ମିଳିଥିଲା ଯେ, ହୋଟେଲ ରାଧା ଗ୍ରାଣ୍ଡରେ ଶରିଫ ମହମ୍ମଦ ନାମକ ଜଣେ ବ୍ୟକ୍ତି ‘ୱିନ୍ ଟୁ ଆର୍ଣ୍ଣ’ ନାମକ ସଂସ୍ଥାର କର୍ମଚାରୀ ଓ ନେତା ଭାବେ ଲୋକଙ୍କୁ ସଦସ୍ୟ କରାଉଛନ୍ତି। ଏଥିପାଇଁ ପ୍ରତ୍ୟେକ ବ୍ୟକ୍ତିଙ୍କଠାରୁ ୫,୭୦୦ ଟଙ୍କା ନିଆଯାଉଥିବା ଅଭିଯୋଗ ହୋଇଥିଲା।
କେବଳ ସଦସ୍ୟ ହେବା ପରେ ଅଟକି ଯାଉନଥିଲା ଏହି ଯୋଜନା। ନୂଆ ଲୋକଙ୍କୁ ସଂସ୍ଥାରେ ଯୋଡ଼ିବାକୁ ସଦସ୍ୟମାନଙ୍କୁ କୁହାଯାଉଥିଲା। ପ୍ରତ୍ୟେକ ନୂଆ ସଦସ୍ୟଙ୍କୁ ଯୋଡ଼ିଲେ ୭୦୦ ଟଙ୍କା ଇନ୍ସେଣ୍ଟିଭ୍ ମିଳିବ ବୋଲି ପ୍ରଲୋଭନ ଦିଆଯାଉଥିବା ପୋଲିସ କହିଛି।
ପୋଲିସ ଜେରା ବେଳେ ଶରିଫ ମହମ୍ମଦ ନିଜକୁ ‘ୱିନ୍ ଟୁ ଆର୍ଣ୍ଣ’ର ଲିଡର ବୋଲି କହିଥିବା ଜଣାପଡ଼ିଛି। ସେ ମେ’ ୨୮ ତାରିଖରୁ ବ୍ରହ୍ମପୁରର ହୋଟେଲରେ ରହୁଥିବା ଏବଂ ବ୍ରହ୍ମପୁର ଓ ଆଖପାଖ ଅଞ୍ଚଳର ପ୍ରାୟ ୯୩ ଜଣଙ୍କୁ ସଦସ୍ୟ କରିଥିବା ପୋଲିସକୁ କହିଥିବା ସୂଚନା ମିଳିଛି। ପ୍ରତ୍ୟେକ ସଦସ୍ୟଙ୍କଠାରୁ ୫,୭୦୦ ଟଙ୍କା ନିଆଯାଇଥିବା ମଧ୍ୟ ଜଣାପଡ଼ିଛି।
ଘଟଣାସ୍ଥଳରୁ ପୋଲିସ ଅଭିଯୁକ୍ତଙ୍କ ପାନ୍ କାର୍ଡ, ଆଧାର କାର୍ଡ, ମୋବାଇଲ୍ ଫୋନ୍, ‘ୱିନ୍ ଟୁ ଆର୍ଣ୍ଣ’ ସମ୍ପର୍କିତ କିଛି କାଗଜପତ୍ର, ଜୁମ୍ ମିଟିଂର ନୋଟିସ୍ ଏବଂ ଏକ ଯୋଜନାର ଫଟୋକପି ଜବତ କରିଛି। ଏହାସହ ଏକ ବାଲେନୋ କାର୍ ମଧ୍ୟ ଜବତ ହୋଇଛି।
ଏହି ମାମଲାରେ ଶରିଫ ମହମ୍ମଦଙ୍କୁ ଅଗଷ୍ଟ ୧୮ ତାରିଖରେ ଗିରଫ କରାଯାଇ କୋର୍ଟରେ ହାଜର କରାଯାଇଛି। ଘଟଣାରେ ଆହୁରି କେତେଜଣଙ୍କ ସମ୍ପୃକ୍ତି ରହିଛି କି ନାହିଁ, ସେନେଇ ପୋଲିସର ତଦନ୍ତ ଜାରି ରହିଛି।
ଲୋକଙ୍କୁ ପୋଲିସର ସତର୍କ ସୂଚନା
ପୋଲିସ ଲୋକଙ୍କୁ ପୋଞ୍ଜି, ଏମ୍ଏଲ୍ଏମ୍ କିମ୍ବା ପିରାମିଡ୍ ସ୍କିମ୍ ଭଳି ଯୋଜନାଠାରୁ ସତର୍କ ରହିବାକୁ ପରାମର୍ଶ ଦେଇଛି। ଅଳ୍ପ ସମୟରେ ଅଧିକ ଟଙ୍କା ମିଳିବ ବୋଲି କେହି ପ୍ରତିଶ୍ରୁତି ଦେଲେ, ତାହାକୁ ଭଲ ଭାବେ ଯାଞ୍ଚ କରିବା ଆବଶ୍ୟକ।
ବିଶେଷକରି, ଟଙ୍କା ଜମା କରି ତା’ପରେ ଅନ୍ୟ ଲୋକଙ୍କୁ ଯୋଡ଼ିଲେ ଟଙ୍କା ମିଳିବ ବୋଲି କୁହାଯାଉଥିବା ଯୋଜନାରେ ଯୋଗଦେବା ପୂର୍ବରୁ ସତର୍କ ହେବାକୁ ପୋଲିସ କହିଛି। ସନ୍ଦେହଜନକ ଆର୍ଥିକ ଯୋଜନା ସମ୍ପର୍କରେ ଜାଣିଲେ ନିକଟସ୍ଥ ଥାନାରେ ଜଣାଇବାକୁ ମଧ୍ୟ ପରାମର୍ଶ ଦିଆଯାଇଛି।
