‘ସୁଭଦ୍ରା’ ଟଙ୍କା ହେଲା କାଳ! ସ୍ତ୍ରୀଙ୍କୁ ପିଟିପିଟି ହତ୍ୟା ଅଭିଯୋଗ, ଲାଟିନ୍ ଟାଙ୍କିରୁ ମିଳିଲା ମୃତଦେହ
ଢେଙ୍କାନାଳ: ଯେଉଁ ଟଙ୍କା ମୁହଁରେ ହସ ଫୁଟାଇବାର ଥିଲା, ସେହି ଟଙ୍କା ଯେ ଜୀବନ ନେଇଯିବ—ଏକଥା କିଏ ବା ଭାବିଥିଲା! ରାକ୍ଷୀ ପୂର୍ଣ୍ଣିମାରେ ମହିଳା ହିତାଧିକାରୀଙ୍କ ଖାତାକୁ ଆସିଥିଲା ‘ସୁଭଦ୍ରା’ ଯୋଜନାର ଟଙ୍କା। କିନ୍ତୁ ଏହି ଟଙ୍କାକୁ ନେଇ ଢେଙ୍କାନାଳରେ ଘଟିଥିବା ଏକ ଅଭାବନୀୟ ଘଟଣା ଏବେ ଚର୍ଚ୍ଚାର କେନ୍ଦ୍ରବିନ୍ଦୁ। ସ୍ତ୍ରୀଙ୍କୁ ଟଙ୍କା ମାଗିବା, ଟଙ୍କା ନଦେବାରୁ ଝଗଡ଼ା ଏବଂ ଶେଷରେ ନିର୍ମମ ହତ୍ୟା—ଏଭଳି ଅଭିଯୋଗ ଆସିଛି ଗିରିଶ ପ୍ରଧାନଙ୍କ ବିରୋଧରେ।
ଘଟଣାଟି ଢେଙ୍କାନାଳ ସଦର ଥାନା ଅନ୍ତର୍ଗତ ଇନ୍ଦିପୁର ଜୁଆଙ୍ଗ ସାହିର ବୋଲି ଜଣାପଡ଼ିଛି। ଅଭିଯୋଗ ଅନୁସାରେ, ଗିରିଶ ପ୍ରଧାନଙ୍କ ପତ୍ନୀ ‘ସୁଭଦ୍ରା’ ଯୋଜନାର ହିତାଧିକାରୀ ଥିଲେ। ରାକ୍ଷୀ ପୂର୍ଣ୍ଣିମା ଅବସରରେ ତାଙ୍କ ବ୍ୟାଙ୍କ ଖାତାକୁ ଯୋଜନାର ଟଙ୍କା ଆସିଥିଲା। ଟଙ୍କା ମିଳିବା ପରେ ଅନ୍ୟ ହିତାଧିକାରୀଙ୍କ ଭଳି ସେ ମଧ୍ୟ ଖୁସି ଥିଲେ। ପରିବାରର ଆବଶ୍ୟକତା ଓ ଭବିଷ୍ୟତ ପାଇଁ ଟଙ୍କା କେଉଁଠି ବ୍ୟବହାର କରିବେ, ସେନେଇ ମଧ୍ୟ ଯୋଜନା କରିଥିବା କୁହାଯାଉଛି।
ହେଲେ ରାତି ପାହିବା ପୂର୍ବରୁ ବଦଳିଗଲା ସବୁକିଛି।
ପୁଲିସ ଅଭିଯୋଗ ଅନୁସାରେ, ଗିରିଶ ପ୍ରଧାନ ମଦ୍ୟପାନ କରିବା ଅଭ୍ୟାସରେ ଥିଲେ। ସୁଭଦ୍ରା ଟଙ୍କା ଖାତାକୁ ଆସିବା ପରେ ସେ ରାତିରେ ପତ୍ନୀଙ୍କୁ ଟଙ୍କା ମାଗିଥିଲେ। କିନ୍ତୁ ମଦ୍ୟପାନରେ ଟଙ୍କା ଖର୍ଚ୍ଚ କରିଦେଉଥିବା ଅଭିଯୋଗ କରି ପତ୍ନୀ ଟଙ୍କା ଦେବାକୁ ମନା କରିଥିଲେ। ଏହାକୁ ନେଇ ଦୁହିଁଙ୍କ ମଧ୍ୟରେ ଝଗଡ଼ା ହୋଇଥିଲା।
ଅଭିଯୋଗ ଅନୁସାରେ, ଝଗଡ଼ା ସମୟରେ ଗିରିଶ ଉତ୍କ୍ଷିପ୍ତ ହୋଇ ବାଡ଼ି ଓ ଶାବଳରେ ପତ୍ନୀଙ୍କୁ ଆକ୍ରମଣ କରିଥିଲେ। ଏଥିରେ ତାଙ୍କର ମୃତ୍ୟୁ ଘଟିଥିବା ପୁଲିସ ଅଭିଯୋଗରେ କୁହାଯାଇଛି। ଏହାପରେ ମୃତଦେହକୁ ଘର ପଛପଟେ ଥିବା ଲାଟିନ୍ ଟାଙ୍କିରେ ପୋତି ଦିଆଯାଇଥିବା ଅଭିଯୋଗ ହୋଇଛି।
ଘଟଣା ସମ୍ପର୍କରେ ସୂଚନା ପାଇ ଢେଙ୍କାନାଳ ସଦର ଥାନା ପୁଲିସ ଏବଂ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ପହଞ୍ଚିଥିଲେ। ଯାଞ୍ଚ ପରେ ମୃତଦେହକୁ ବାହାର କରାଯାଇ ବ୍ୟବଚ୍ଛେଦ ପାଇଁ ପଠାଯାଇଛି। ପୁଲିସ ଅଭିଯୁକ୍ତ ଗିରିଶଙ୍କୁ ଗିରଫ କରିବା ସହ ଘଟଣାସ୍ଥଳରେ ସିନ୍ ରିକ୍ରିଏସନ୍ କରିଥିବା ଜଣାପଡ଼ିଛି।
ସୁଭଦ୍ରା ଟଙ୍କାର ପଞ୍ଚମ କିସ୍ତି
ସୂଚନାଯୋଗ୍ୟ, ନୟାଗଡ଼ ଜିଲ୍ଲା ଲାଠିପଡ଼ାଠାରେ ଗତକାଲି ମୁଖ୍ୟମନ୍ତ୍ରୀ, ବାଚସ୍ପତି, ଉପମୁଖ୍ୟମନ୍ତ୍ରୀ, ସାଂସଦ ଓ ବିଧାୟକଙ୍କ ଉପସ୍ଥିତିରେ ‘ସୁଭଦ୍ରା’ ଯୋଜନାର ପଞ୍ଚମ କିସ୍ତି ପ୍ରଦାନ କରାଯାଇଥିଲା। ରାଜ୍ୟର ୧ କୋଟି ୩ ଲକ୍ଷ ୨୬ ହଜାର ୧୬୨ ଜଣ ହିତାଧିକାରୀଙ୍କୁ ୫,୧୬୩ କୋଟିରୁ ଊର୍ଦ୍ଧ୍ୱ ଟଙ୍କା ପ୍ରଦାନ କରାଯାଇଥିବା ସୂଚନା ରହିଛି।
ତେବେ ଖୁସିର ଏହି ଦିନରେ ଢେଙ୍କାନାଳରୁ ସାମ୍ନାକୁ ଆସିଥିବା ଏହି ହୃଦୟବିଦାରକ ଘଟଣା ଅନେକ ପ୍ରଶ୍ନ ଛିଡ଼ା କରିଛି। ତେବେ ହତ୍ୟାର ପ୍ରକୃତ କାରଣ, ଘଟଣାର ପୂରା ପୃଷ୍ଠଭୂମି ଏବଂ ଟଙ୍କାକୁ ନେଇ ବିବାଦର ଭୂମିକା ପୁଲିସ ତଦନ୍ତ ଓ ପରବର୍ତ୍ତୀ ଆଇନଗତ ପ୍ରକ୍ରିୟାରେ ସ୍ପଷ୍ଟ ହେବ।
