ବ୍ରହ୍ମପୁର: ବ୍ରହ୍ମପୁର ଅଶୋକ ନଗରରେ ଧୁମ୍‌ଧାମରେ ହେବ ଗଣେଶ ପୂଜା। ପବିତ୍ର ସିଦ୍ଧି ବିନାୟକ ପୂଜା ଉତ୍ସବ ଅବସରରେ ଅଶୋକ ନଗର ଯୁବକ ସଂଘ ପକ୍ଷରୁ ପ୍ରତିବର୍ଷ ଆୟୋଜିତ ହୋଇଆସୁଛି ଗଣେଶ ପୂଜା ଉତ୍ସବ। ଚଳିତବର୍ଷ ଏହି ପୂଜା ୧୯ ବର୍ଷରେ ପଦାର୍ପଣ କରିଛି। ଚଳିତବର୍ଷ ୩୨ ନମ୍ବର ୱାର୍ଡରେ ୩୨ ଫୁଟର ଲାଲବାଗଚା ଗଣେଶ ମୂର୍ତ୍ତି ଆୟୋଜନ କରାଯାଇଛି। ପୂଜା ଉତ୍ସବକୁ ଆହୁରି ଆକର୍ଷଣୀୟ କରିବା ସହ ବ୍ରହ୍ମପୁରର ପ୍ରତିଭା ଅନ୍ୱେଷଣ ଉଦ୍ଦେଶ୍ୟରେ ସଂଘ ପକ୍ଷରୁ ବିଭିନ୍ନ କାର୍ଯ୍ୟକ୍ରମର ଆୟୋଜନ କରାଯାଇଛି। ଏହି ମହୋତ୍ସବରେ ଜୁନିୟର ଓ ସିନିୟର—ଦୁଇଟି ବିଭାଗରେ ପ୍ରତିଭା ପ୍ରତିଯୋଗିତା ଅନୁଷ୍ଠିତ ହେବ। ବହୁ ଉତ୍ସାହୀ କଳାକାର ଏଥିପାଇଁ ପଞ୍ଜିକରଣ କରିଛନ୍ତି। ଶ୍ରେଷ୍ଠ ପ୍ରତିଭାଙ୍କୁ ‘ଶ୍ରେଷ୍ଠ ବ୍ରହ୍ମପୁର ପ୍ରତିଭା’ ସମ୍ମାନରେ ସମ୍ମାନିତ କରାଯିବା ନେଇ ମଧ୍ୟ ଉଲ୍ଲେଖ ରହିଛି। ପୂଜା ଅବସରରେ ପ୍ରତ୍ୟେକ ଦିନ ରଙ୍ଗାରଙ୍ଗ କାର୍ଯ୍ୟକ୍ରମ ରହିବ। ୧୫ ସେପ୍ଟେମ୍ବରରୁ ୨୧ ସେପ୍ଟେମ୍ବର ୨୦୨୬ ପର୍ଯ୍ୟନ୍ତ ପ୍ରତ୍ୟେକ ଦିନ ସକାଳ ୮ଟା ସମୟରେ ପୂଜା ଅର୍ଚ୍ଚନା କରାଯିବ। ଏଥିସହ ପ୍ରତ୍ୟେକ ଦିନ ସନ୍ଧ୍ୟା ସମୟରେ ଛୋଟ ଓ ବଡ଼ ପିଲାମାନଙ୍କ ପାଇଁ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହେବ। ସାମାଜିକ କାର୍ଯ୍ୟକ୍ରମ ଭାବେ ୨୨ ସେପ୍ଟେମ୍ବର ୨୦୨୬ରେ ବ୍ଲଡ୍ ଡୋନେସନ୍ କ୍ୟାମ୍ପ ଆୟୋଜନ କରାଯିବ। ଏହି ରକ୍ତଦାନ ଶିବିର ସକାଳ ୮ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ଚାଲିବ। ସେହିପରି ୨୪ ସେପ୍ଟେମ୍ବର ୨୦୨୬ ସନ୍ଧ୍ୟା ୫ଟା ୪୬ ମିନିଟ୍‌ରେ ଗଣେଶ ପୂଜାର ପୂର୍ଣ୍ଣାହୁତି କାର୍ଯ୍ୟକ୍ରମ ରହିଛି। ଏହାର ପରଦିନ, ୨୫ ସେପ୍ଟେମ୍ବର ୨୦୨୬ରେ କ୍ଷୀରାଭିଷେକ ଓ ବିସର୍ଜନ କାର୍ଯ୍ୟକ୍ରମ ରହିଥିବା ପେପରରେ ଉଲ୍ଲେଖ କରାଯାଇଛି। ପୂଜା ଉତ୍ସବ ସମ୍ପର୍କିତ ଏହି ଖବରକୁ ଗଣମାଧ୍ୟମରେ ପ୍ରଚାର କରି ମହୋତ୍ସବକୁ ଅଧିକ ପ୍ରଚାର ଓ ପ୍ରସାର କରିବା ପାଇଁ ଅଶୋକ ନଗର ଯୁବକ ସଂଘ ପୂଜା କମିଟି ପକ୍ଷରୁ ନିବେଦନ କରାଯାଇଛି। ୩୨ ଫୁଟର ଲାଲବାଗଚା ଗଣେଶ, ପ୍ରତିଭା ପ୍ରତିଯୋଗିତା, ସାଂସ୍କୃତିକ କାର୍ଯ୍ୟକ୍ରମ ସହ ରକ୍ତଦାନ ଶିବିର—ଏଥର ଅଶୋକ ନଗରର ଗଣେଶ ପୂଜା ଉତ୍ସବକୁ ନେଇ ଜୋରଦାର ପ୍ରସ୍ତୁତି ଆରମ୍ଭ ହୋଇଛି।