ବ୍ରହ୍ମପୁର: ଚିତ୍ରକଳା ପ୍ରତି ଥିଲା ଅଗାଧ ଭଲପାଇବା। କ୍ୟାନଭାସ୍ରେ ରଙ୍ଗ ଓ ରେଖାରେ ସ୍ୱପ୍ନ ଆଙ୍କୁଥିବା ଜଣେ ଯୁବକ ଆଜି ସେହି ସୃଜନଶୀଳତାକୁ ନେଇ ପହଞ୍ଚିଛନ୍ତି ମହାକାଶ ସ୍ଥାପତ୍ୟର ଦୁନିଆରେ। ଘରର ନକ୍ସା ତିଆରିରୁ ଆରମ୍ଭ କରି ଏବେ ସ୍ପେସ୍ ଆର୍କିଟେକ୍ଚର କ୍ଷେତ୍ରରେ ନୂଆ ସମ୍ଭାବନା ଖୋଜୁଛନ୍ତି ବ୍ରହ୍ମପୁର ସହରର ଯୁବ ଆର୍କିଟେକ୍ଟ ବିଶ୍ୱଜିତ ଦାଶ।
କଳା ପ୍ରତି ଥିବା ଅନୁରାଗକୁ ନିଜର ପେସାଦାରୀ ଦକ୍ଷତା ସହ ଯୋଡ଼ି ବିଶ୍ୱଜିତ ନିଜ ପାଇଁ ଏକ ଭିନ୍ନ ପରିଚୟ ସୃଷ୍ଟି କରିଛନ୍ତି। ଚିତ୍ରକଳାକୁ କ୍ୟାରିୟରର ପ୍ରାରମ୍ଭିକ ପଥ ଭାବେ ବାଛିଥିବା ବିଶ୍ୱଜିତ ପରବର୍ତ୍ତୀ ସମୟରେ ଆର୍କିଟେକ୍ଚର କ୍ଷେତ୍ରରେ ପାଦ ରଖିଥିଲେ।
ଘର ନିର୍ମାଣ ପାଇଁ ଆକର୍ଷଣୀୟ, ଆଧୁନିକ ଓ ବ୍ୟବହାରଯୋଗ୍ୟ ନକ୍ସା ପ୍ରସ୍ତୁତ କରିବା ପରେ ସେ ଆପଣେଇଛନ୍ତି ଆହୁରି ଏକ ଚ୍ୟାଲେଞ୍ଜିଂ ପଥ। ନିଜର କମ୍ପାନି ମାଧ୍ୟମରେ ଏବେ ସେ ସ୍ପେସ୍ ଆର୍କିଟେକ୍ଚର ଦିଗରେ ନୂଆ ଚିନ୍ତାଧାରା ଓ ଡିଜାଇନ୍କୁ ନେଇ କାମ କରୁଛନ୍ତି।
ମହାକାଶରେ କେମିତି ହେବ ମଣିଷର ଜୀବନ?
ମହାକାଶରେ ମଣିଷ କିପରି ରହିବ? ସେଠାରେ ଦୈନନ୍ଦିନ ଜୀବନ କିପରି କଟିବ? ରହିବା ପାଇଁ କେଉଁ କେଉଁ ମୌଳିକ ସୁବିଧାର ଆବଶ୍ୟକତା ପଡ଼ିବ? ମହାକାଶଚାରୀଙ୍କ ଜୀବନଶୈଳୀକୁ କିପରି ଆହୁରି ସୁବିଧାଜନକ କରାଯାଇପାରିବ?
ଏହିସବୁ ପ୍ରଶ୍ନର ଉତ୍ତର ଖୋଜିବା ଦିଗରେ ଗବେଷଣା କରୁଛନ୍ତି ବିଶ୍ୱଜିତ ଓ ତାଙ୍କ ଟିମ୍। ମହାକାଶଚାରୀଙ୍କ ସହ ଯୋଗାଯୋଗରେ ରହି ସେମାନେ ମହାକାଶରେ ରହିବା ସମୟରେ ସାମ୍ନା କରୁଥିବା ଆବଶ୍ୟକତା, ସମସ୍ୟା ଓ ଦୈନନ୍ଦିନ ଜୀବନଶୈଳୀ ସମ୍ପର୍କରେ ଅଧ୍ୟୟନ କରୁଛନ୍ତି।
ବିଶ୍ୱଜିତଙ୍କ ଟିମ୍ର ଲକ୍ଷ୍ୟ ହେଉଛି, ଭବିଷ୍ୟତରେ ମହାକାଶରେ ମଣିଷଙ୍କ ରହିବା ପାଇଁ ଅଧିକ ସୁବିଧାଜନକ ଓ ବ୍ୟବହାରଯୋଗ୍ୟ ସ୍ଥାନ ଡିଜାଇନ୍ କରିବା। ଏଥିପାଇଁ ସେମାନେ କଳା, ସ୍ଥାପତ୍ୟ, ବିଜ୍ଞାନ ଓ ପ୍ରଯୁକ୍ତିବିଦ୍ୟାର ସମନ୍ୱୟରେ ନୂଆ କନ୍ସେପ୍ଟ ଉପରେ କାମ କରୁଛନ୍ତି।
ଭାରତରେ ବଢ଼ୁଛି ସ୍ପେସ୍ ଆର୍କିଟେକ୍ଚରର ସମ୍ଭାବନା
ଗତ କିଛି ବର୍ଷ ଧରି ଭାରତରେ ମହାକାଶ କ୍ଷେତ୍ରରେ ଗବେଷଣା ଓ ନୂଆ ପ୍ରୟୋଗ ପାଇଁ ସୁଯୋଗ ବଢ଼ିଛି। ଏଭଳି ସମୟରେ ସ୍ପେସ୍ ଆର୍କିଟେକ୍ଚର ଯୁବପିଢ଼ି ପାଇଁ ଭବିଷ୍ୟତର ଏକ ନୂଆ ଓ ସମ୍ଭାବନାମୟ କ୍ଷେତ୍ର ହୋଇପାରିବ ବୋଲି ବିଶ୍ୱଜିତ କହିଛନ୍ତି।
ଭବିଷ୍ୟତରେ ଭାରତର ମାନବ ମହାକାଶ ଅଭିଯାନ ଓ ମହାକାଶ ଗବେଷଣା କ୍ଷେତ୍ରରେ ଆହୁରି ବଡ଼ ପଦକ୍ଷେପ ନିଆଯିବାକୁ ଥିବାବେଳେ, ମହାକାଶରେ ରହିବା ପାଇଁ ଆବଶ୍ୟକ ଭିତ୍ତିଭୂମି ଓ ଜୀବନଯାପନ ବ୍ୟବସ୍ଥା ଡିଜାଇନ୍ କରିବା କ୍ଷେତ୍ରରେ ସ୍ପେସ୍ ଆର୍କିଟେକ୍ଟଙ୍କ ଭୂମିକା ଆହୁରି ବଢ଼ିବ ବୋଲି ସେ ଆଶା ରଖିଛନ୍ତି।
ନିଜର ଗବେଷଣା, ପ୍ରଶିକ୍ଷଣ ଓ ସୃଜନଶୀଳ ଚିନ୍ତାଧାରାକୁ ଆହୁରି ବ୍ୟାପକ କରି ଦିନେ ମହାକାଶ ଗବେଷଣା ସହ ସିଧାସଳଖ ଭାବେ ଯୋଡ଼ିହେବା ବିଶ୍ୱଜିତଙ୍କ ବଡ଼ ସ୍ୱପ୍ନ।
କ୍ୟାନଭାସ୍ରୁ ଆରମ୍ଭ ହୋଇଥିବା ଏହି ଯାତ୍ରା ଏବେ ମହାକାଶ ପର୍ଯ୍ୟନ୍ତ ପହଞ୍ଚିବାର ଲକ୍ଷ୍ୟ ରଖିଛି। ଚିତ୍ରକଳା, ସ୍ଥାପତ୍ୟ ଓ ବିଜ୍ଞାନର ଏହି ଅନନ୍ୟ ମିଶ୍ରଣ ବିଶ୍ୱଜିତ ଦାଶଙ୍କ ସ୍ୱପ୍ନକୁ ଦେଇଛି ଏକ ନୂଆ ଉଡ଼ାଣ।
