ବ୍ରହ୍ମପୁର: ପେଟ୍ରୋଲ ପମ୍ପରୁ ତାମ୍ବା କେବୁଲ ଚୋରି ଘଟଣାର ପର୍ଦ୍ଦାଫାସ କରିଛି ବ୍ରହ୍ମପୁର ସଦର ଥାନା ପୋଲିସ। ଏହି ଘଟଣାରେ ଦୁଇ ଜଣ ଚୋରଙ୍କ ସହ ଚୋରି ସାମଗ୍ରୀ କିଣିଥିବା ଜଣେ ସ୍କ୍ରାପ୍ ବ୍ୟବସାୟୀଙ୍କୁ ପୋଲିସ ଗିରଫ କରିଛି। ଅଭିଯୁକ୍ତମାନଙ୍କଠାରୁ ଚୋରି ହୋଇଥିବା ତମ୍ବା ମଧ୍ୟ ଉଦ୍ଧାର କରାଯାଇଛି।
ସୂଚନା ଅନୁସାରେ, ସେପ୍ଟେମ୍ବର ୧୧ ତାରିଖରେ ବାଘଝରି କାଳୁଆ ଗେଟ୍ ଛକ ନିକଟସ୍ଥ JIO BP ପେଟ୍ରୋଲ ପମ୍ପର ପଛପଟୁ ତମ୍ବା କେବୁଲ ଚୋରି ହୋଇଥିଲା। ଘଟଣା ପରେ ପେଟ୍ରୋଲ ପମ୍ପ ମାଲିକ ତିରୁପତି ସାହୁ ସେପ୍ଟେମ୍ବର ୧୨ରେ ବ୍ରହ୍ମପୁର ସଦର ଥାନାରେ ଅଭିଯୋଗ କରିଥିଲେ।
ଅଭିଯୋଗ ଆଧାରରେ ବ୍ରହ୍ମପୁର ସଦର ଥାନା ପୋଲିସ କେସ୍ ନମ୍ବର ୫୭୬/୨୦୨୬ ରୁଜୁ କରି ଭାରତୀୟ ନ୍ୟାୟ ସଂହିତା (BNS)ର ଧାରା ୩୦୩(୨) ଅନୁଯାୟୀ ତଦନ୍ତ ଆରମ୍ଭ କରିଥିଲା।
ତଦନ୍ତ ସମୟରେ ପୋଲିସ ରାଲିଙ୍ଗନଗରର ରଞ୍ଜନ ଦାସ (୨୬) ଏବଂ ପଦରାବାଲିର ପଞ୍ଚୁ ଦାସ (୨୨)ଙ୍କୁ ଧରି ପଚରାଉଚରା କରିଥିଲା। ପୋଲିସ ତଦନ୍ତରୁ ଜଣାପଡ଼ିଥିଲା ଯେ, ଦୁଇ ଅଭିଯୁକ୍ତ ପେଟ୍ରୋଲ ପମ୍ପରୁ କେବୁଲ ଚୋରି କରିବା ପରେ ଏଥିରେ ଥିବା ପ୍ଲାଷ୍ଟିକ୍ ଆବରଣକୁ ପୋଡ଼ି ତାମ୍ବା ବାହାର କରିଥିଲେ। ପରେ ଉକ୍ତ ତାମ୍ବାକୁ ଅଙ୍କୁଶପୁରର ଜଣେ ସ୍କ୍ରାପ୍ ବ୍ୟବସାୟୀ ହିନା ସାହୁ (୫୦)ଙ୍କୁ ୭ ହଜାର ଟଙ୍କାରେ ବିକ୍ରି କରିଥିବା ଜଣାପଡ଼ିଥିଲା।
ଏହି ସୂଚନା ଆଧାରରେ ପୋଲିସ କାଳୁଆ ଛକ ନିକଟରେ ଥିବା ଏକ ସ୍କ୍ରାପ୍ ଦୋକାନରେ ଚଢ଼ାଉ କରି ଚୋରି ହୋଇଥିବା ତାମ୍ବାକୁ ଉଦ୍ଧାର କରିଥିଲା। ଭାରତୀୟ ସାକ୍ଷ୍ୟ ଅଧିନିୟମ (BSA)ର ଧାରା ୨୩(୨) ଅନୁଯାୟୀ ରେକର୍ଡ ହୋଇଥିବା ଅଭିଯୁକ୍ତଙ୍କ ବୟାନ ଆଧାରରେ ଏହି ଉଦ୍ଧାର କରାଯାଇଥିବା ପୋଲିସ ପକ୍ଷରୁ କୁହାଯାଇଛି।
ଘଟଣାରେ ରଞ୍ଜନ ଦାସ, ପଞ୍ଚୁ ଦାସ ଏବଂ ଚୋରି ସାମଗ୍ରୀ କିଣିଥିବା ହିନା ସାହୁଙ୍କ ବିରୋଧରେ BNSର ଧାରା ୩୦୩(୨), ୩(୫) ଏବଂ ୩୧୭(୨) ଅନୁଯାୟୀ ମାମଲା ରୁଜୁ କରାଯାଇଛି।
ତିନି ଅଭିଯୁକ୍ତଙ୍କୁ ସେପ୍ଟେମ୍ବର ୧୩ ତାରିଖରେ ଆନୁଷ୍ଠାନିକ ଭାବେ ଗିରଫ କରାଯାଇଛି। ପରେ ସମସ୍ତଙ୍କୁ କୋର୍ଟରେ ହାଜର କରାଯାଇଛି। ବ୍ରହ୍ମପୁର ସଦର ଥାନା ପୋଲିସର ତଦନ୍ତ ଓ ଚଢ଼ାଉ ପରେ ପେଟ୍ରୋଲ ପମ୍ପରୁ ତମ୍ବା କେବୁଲ ଚୋରି ଘଟଣାର ସମାଧାନ ହୋଇଛି।
